KV De Piepkukes ès opgerichtj in november 1963.
De naam De Piepkukes ès ontlieëndj aan ‘t destieëds fokke van piepkukes in oos omgaeving door de minder draagkrachtige minse, di-j naeve eur werk nog ‘n bi-jverdeenste noeëdig haaje om rondj te koome.
Destieëds woore ‘t groeëte gezinne met ‘n karig inkome en dat woort dan aangevöldj met de inkomste oet ‘t slachtrieëp maake van piepkukes.

In de ieërste jaore waas d'r waal ‘n besteur met leede vanne Raod van Elluf en de tôwmalige president Jack Verstappen, dae later woort opgevolgdj door Louis Hermans. Dao waas waal nog geine prins. De veurzitter woort aangevöldj met secretaris Harrie Sentjens en de latere penningmeister Lei Heijnen.

De ieërste prins, Prins Jef I Bongers woort in 1969 oetgeroope. In di-j jaore woore d'r nog gein prinserecepties en begos op zondig de 'Vastelaovendj' dae leep tot en met de deénsdig. In dees beginperiode woorte d'r nog völ dansaovendje georganiseerdj. En d'r waas al sprake van Bonte Aovendje di-j plaats vônge oppe zölder van de veurmalige school. Ouch woort d'r ‘n dansgroep genaamdj 'Dansmarietjes' opgerichtj. 

Prins Jef I woort daonoa ooze ieërste Vorst. De vergaderinge woorte beurtelings gehaoje bi-j café Frans Hoezen en de latere oetbater Broer vanne Berk en bi-j café Hulsers, Baantj Pieër. Ooze Ieërevorst Frans waas de veerdje en teves lèste Prins dae woort oetgeroope oppe schoolzölder. 
Ut jaor daonao in 1973 waas de gymnastiekzaal 'Reigershorst' klaor en kos men gebroeêk maake van deze zaal, ‘t aanwezig podium woort laternao aangebouwdj. Ut jaor daornao woort Frans Heijnen Vorst. Hae vervöldje dees functie 22 jaor lank tot 1995. Hae woort opgevolgdj door Vorst Peter Wijen. Peter heet nao 22 jaor zien taak overgedrage aan Vorst Marc Beelen. Prins Frans II waas de ieërste prins dae adjudante haaj aangesteldj, te weite Henk Konings en Henk Loyen.

In 1974 woort de ieërste Tok Tok show georganiseerdj en de ieërste winnaar waas Broer van de Berk. Vanaaf dae tieëd woort dit leedjesfestijn eder jaor georganiseerdj. Vae maake al jaore gebroeêk van 't Vastelaoves Kwintet'. Ut Kwintet bestieët op dit moment oet Bert Peeters, Wiel Ghielen, Ieërevorst Peter Wijen en Wim van Hunsel. In 2006 organiseerdje vae vör de derdje kieêr de Limburgse Buuttekampioenschappe en det haaje vae te danke aan ooze dri-jvoudig Limburgs Buuttekampioen Will Knapen. Twèlf jaor later in 2018 ès ‘t Bjorn Smits dae de Limburgse Buuttekampioenschappe wist te winne. Presaties wao vae as vereiniging hieël grueëts op zeen.

Op dit moment  ès oos vereiniging oetgebouwdj en vaee kunne met recht spraeke van ein blujjendje vereiniging, di-j bestieët oet unne Prins, Prinses, Adjudante, Vorst, Ieërelede, Raodslede, reserve Raodslede, Damesgarde, vereiniginslede, Kwikstertjes, Blaoskracht 11 en ‘n voltallig besteur. Johan van de Loo as veurzitter, Nicole Reinders as secretaris en Jeroen Rietjens as penningmeister vorme ‘t dageliks besteur.
 
Vanaaf 1985 ès d'r ‘n schoeën jeugdvereiniging genaamdj De Krielkes actief, woeëdet de Jeugdprins en de Raod gekoze waere oet de lieërlinge van groep 8 van basisschool De Tweesprong. Bi-j de Krielkes ès Edwin Beelen de veurrzitter, Chantal Smits de secretaris en Harm Haex de penningmeister.

Op 17 en 18 november 2018 veerdje vae oos 55 jaorig jubileum. Op zaoterdag nao eine geslaagdje brunch vör alle leej woort ein nôw item onthuldj bi-j 't kunstwerk. Op de sokkel woorte alle prinse oet oos prinsegaleri-j verieëuwigdj met naam en jaortal, Daoanao vong d'r ‘n recepsie plaats gevolgdj door eine schoeëne artiestenaovendj. De zondig stong in ‘t teiken vanne jubileumgames vör de gemeinschap van d’Indj met as hoeëgtepuntj de kuukerace. Ut jubileumweekend woort afgesloote met ein optraeje van Moerepetazie. Un onvergaetelijk fieëst met dank aan de jubileumcommissie.